ខេត្តព្រះសីហនុ៖ បុរសជនជាតិចិនម្នាក់អុកឡុកហាងម៉ាស្សាមួយកន្លែងក្នុងខេត្តព្រះសីហនុ ត្រូវបានសមត្ថកិច្ចឃាត់ខ្លួន ក្រោយផ្ទុះអំពើហឹង្សាទាញដំបងវាយរបស់របរនិងកញ្ចក់ទ្វាហាង ខណៈដែលចូលហាងខាងលើសួររកនារីបំរើផ្លូវភេទ តែត្រូវមេការថាគ្មានសេវាទេ។
ហេតុការណ៍នេះ បានបង្ករការភ្ញាក់ផ្អើលនៅវេលាម៉ោង ១១និង៤០នាទីយប់ ថ្ងៃទី១៨ ខែមីនាឆ្នាំ២០២២ ស្ថិតតាមបណ្ដោយផ្លូវ ឯករាជ្យ សង្កាត់២ ក្រុងព្រះសីហនុ ខេត្តព្រះសីហនុ។
តាមប្រភពព័ត៌មានពីកន្លែងកើតហេតុបានប្រាប់អោយដឹងថា មុនពេលកើតហេតុគេឃើញបុរសជនជាតិចិនដើរចូលហាងម៉ាស្សាខាងលើ ហៅមេការមកសួររកនារីបំរើផ្លូវភេទ មេការប្រាប់ថាកន្លែងពុំមានសេវាបំរើផ្លូវភេទទេ។ ភ្លាមៗនោះស្រាប់តែបុរសជនជាតិចិនខឹងបានទាញដំបងវាយរបស់របររួចគេចខ្លួនទៅបាន មួយសន្ទុះក្រោយមកស្រាប់តែឃើញបុរសជនជាតិចិនដដែលកានដុំឥដ្ឋនិងដុំថ្មគុបសំដៅហាង បណ្ដាលអោយបែកកញ្ចក់ទ្វាហាងនិងខូចខាតរបស់របរមួយចំនួនធំ រួចព្យាយាមរត់ចូលសណ្ឋាគារមួយកន្លែង តែត្រូវបុគ្គលិកហាងដេញតាមពីក្រោយទាន់និងរាយការយ៍ជូនសមត្ថកិច្ចជួយអន្តរាគមន៍។
ក្រោយទទួលបានដំណឹងពីប្រជាពលរដ្ឋ កម្លាំងអន្តរាគមន៍ពិសេសខេត្តព្រះសីហនុ បានដឹកនាំកម្លាំជាច្រើននាក់ចុះមកដល់សណ្ឋាគារដែលជនបង្កសំងំលាក់ខ្លួន និងសុំការសហការជាមួយម្ចាស់សណ្ឋាគារសុំអោយជនបង្កចុះមកធ្វើការដោះស្រាយគ្នាជាមួយម្ចាស់ហាងម៉ាស្សានៅស្នងការនគរបាលខេត្តដើម្បីបញ្ចប់រឿង ៕